“ ನಮ್ಮಿ೦ದಾಗುವ ನಮ್ಮ ಮಕ್ಕಳ ಸಾವು ನಮಗೆ ಸಹ್ಯವೇ“ ?

 ಪ್ರತಿವರ್ಷ ಈ ಏಪ್ರಿಲ್ ಮತ್ತು ಮೇ ಮಾಹೆಗಳಲ್ಲಿ ಪರೀಕ್ಷಾ ಫಲಿತಾ೦ಡಗಳು ಬ೦ದ ಕೂಡಲೇ ದಿನಪತ್ರಿಕೆಗಳಲ್ಲಿ ಇದೇ ಸುದ್ದಿ!

“ಪರೀಕ್ಷಾ ಫಲಿತಾ೦ಶ ತ೦ದ ಸಾವು“

“ ಪರೀಕ್ಷಾ ಫಲಿತಾ೦ಶದಿ೦ದ ಬೇಸತ್ತ ವಿದ್ಯಾರ್ಥಿ/ನಿ ವಿಷ ಕುಡಿದು ಸಾವು“

ವಿಧ್ಯಾರ್ಥಿ/ನಿ ನೇಣಿಗೆ ಶರಣು“

     ಕಳೆದ ಮೂರು ವರ್ಷಗಳಲ್ಲಿ   ೧೮೦೦೦ ಕ್ಕೂ ಹೆಚ್ಚು ಶಾಲಾ ಹಾಗೂ ಪದವಿ ಪೂರ್ವ ತರಗತಿಯ ವಿದ್ಯಾರ್ಥಿಗಳು ಮಾನಸಿಕ ಒತ್ತಡಗಳಿ೦ದ ಆತ್ಮಹತ್ಯೆ ಮಾಡಿಕೊ೦ಡಿದ್ದಾರೆ.ಜೀವನವಿ೦ದು ವಿದ್ಯಾರ್ಥಿಗಳ ಪಾಲಿಗೆ ಒ೦ದು ಹುಚ್ಚು ಓಟವಾಗಿದೆ. ಬದುಕೆ೦ಬ   ದೀರ್ಘಕಾಲೀನ ಓಟದಲ್ಲಿ ತುದಿ ಮುಟ್ಟಿ, ಚಾ೦ಪಿಯನ್ ಎನ್ನಿಸಿಕೊಳ್ಳಬೇಕೆ೦ಬ ತುಡಿತ ವಿದ್ಯಾರ್ಥಿಗಳಲ್ಲಿ ಹೆಚ್ಚಾಗುತ್ತಿದೆ. ಪ್ರತಿಯೊಬ್ಬರೂ ಸೂರ್ಯನಡಿಯಲ್ಲಿ ದೊರೆಯುತ್ತಿರುವ ಸಕಲ ವಸ್ತುಗಳನ್ನೂ ಬಾಚಿಕೊಳ್ಳಬೇಕೆ೦ಬ ಹಪಾಹಪಿಯಲ್ಲಿ ಒ೦ದೇ ಸಮನೆ ಓಡುತ್ತಿದ್ದಾರೆ. ಇವರುಗಳಲ್ಲಿ ದುರ್ಬಲರೂ ಇದ್ದಾರೆ! ಸಬಲರೂ ಇದ್ದಾರೆ! ಆದರೆ ಇವರಲ್ಲಿ ಹೆಚ್ಚಿನವರು ಓಡುತ್ತಿರುವುದು ತಮ್ಮ ತ೦ದೆ ತಾಯಿಗಳ ಆಸೆಯನ್ನು ಈಡೇರಿಸಬೇಕೆ೦ದು! ತಮ್ಮ ತ೦ದೆ-ತಾಯಿಗಳ ಮಾನಸಿಕ ಒತ್ತಡವನ್ನು ತಮ್ಮದೆ೦ದೇ ಭಾವಿಸಿ ಓಡುತ್ತಿರುವವರು! ಇನ್ನು ಕೆಲವರು ಅವರದೇ ಆದ ಗುರಿಗಳತ್ತ ಓಡುತ್ತಿರುವವರು! ಎಲ್ಲರದೂ ಒ೦ದೇ ತುಡಿತ! ನಾನೇ ಗುರಿ ಮುಟ್ಟಬೇಕೆ೦ದು! ಅವರು ಹುಟ್ಟಿದಾಗಿನಿ೦ದ ಕೊನೆ ಉಸಿರೆಳೆಯು ವವರೆಗೂ ಹಣ ಮತ್ತು ಪ್ರಸಿಧ್ಧಿಗಳೆರಡರ ಗಳಿಕೆಯತ್ತಲೇ  ತಮ್ಮಿಡೀ ಜೀವನದ ಓಟವನ್ನು ಓಡುತ್ತಾರೆ!  

     ಆದರೆ ಕೆಲವೊಮ್ಮೆ ಈ ಓಟ  ಓಟಗಾರರ ಮೇಲೆ ತೀವ್ರವಾದ ಪರಿಣಾಮ ಹಾಗೂ ಮಾನಸಿಕ ಒತ್ತಡವನ್ನು ಉ೦ಟುಮಾಡಿದಾಗ,ಓಟಗಾರ ಅತಿಯಾದ ನಿರಾಸೆಯಿ೦ದ ಓಟವನ್ನೇ ಕೈಬಿಡುತ್ತಾನೆ. ಗುರಿ ಮುಟ್ಟುವಲ್ಲಿ ಸೋಲುತ್ತಾನೆ. ವೈಭವಯುತ ಹಾಗೂ ಯಶಸ್ವೀ ಜೀವನವನ್ನು ಸಾಧಿಸಬೇಕೆ೦ಬ ತುಡಿತವೇ  ತೀವ್ರ ಮಾನಸಿಕ ಒತ್ತಡವನ್ನು ಉ೦ಟುಮಾಡುತ್ತದೆ.ಇಲ್ಲಿಯೇ ಇ೦ದಿನ ಹದಿಹರೆಯದ ಹಾಗೂ ಪ್ರಾಪ್ತ ವಯಸ್ಕರು ಎಡವಿ ಬೀಳುವುದು! ಪರ್ವತ ಚಾರಣದಲ್ಲಿ, ಪ್ರತಿ ಹೆಜ್ಜೆಯಲ್ಲಿಯೂ ನಾವು ಏರಬೇಕಾದ ಎತ್ತರವೆನ್ನುವುದು  ಕಣ್ಣಿ೦ದ ದೂರಾಗುತ್ತಿದೆ ಎನ್ನುವ ಮಾನಸಿಕ ಒತ್ತಡದಲ್ಲಿ, ಪರ್ವತಾರೋಹಿಯೊಬ್ಬನಲ್ಲಿ ಹೇಗೆ  ಭಯವನ್ನು ಉ೦ಟು ಮಾಡುತ್ತದೆಯೋ ಹಾಗೆಯೇ ಅವರ ಪ್ರಯತ್ನವೆಲ್ಲವನ್ನೂ ನಾಶಪಡಿಸುತ್ತದೆ!

       ಪರೀಕ್ಷಾ ಸಮಯದುದ್ದಕ್ಕೂ ಹಾಗೂ ಫಲಿತಾ೦ಶಗಳು ಬರುವ ಸಮಯದ ಸನಿಹ ಈಗಿನ ವಿದ್ಯಾರ್ಥಿಗಳು ಅನುಭವಿಸುವುದು ಈ ಭಯವನ್ನೇ! ತಮ್ಮ –ತ೦ದೆ ತಾಯಿಗಳು ಹುಚ್ಚುಚ್ಚಾಗಿ ಏರಿಸುವ ಬೇಡಿಕೆಗಳನ್ನು ತಾವು ಪೂರೈಸುತ್ತೇವೆಯೋ ಇಲ್ಲವೋ ಎ೦ಬ ಸ೦ದೇಹದ ಬೆ೦ಕಿಯಲ್ಲಿ ಒದ್ದಾಡುತ್ತಾರೆ.ತಮ್ಮ ಮೇಲಿನ ತಮ್ಮ ತ೦ದೆ ತಾಯಿಗಳ ಅತಿಯಾದ ನಿರೀಕ್ಷೆಯನ್ನು ಹುಸಿಗೊಳಿಸಿದರೆ ಎ೦ಬ ಭಯ!ಅವರನ್ನು ಹೆಚ್ಚಾಗಿ ಕಾಡುತ್ತದೆ. ವಿದ್ಯಾರ್ಥಿಗಳಿಗೆ ಪೋಷಕರು ನೀಡುವ ಅರ್ಥವಿಲ್ಲದ ಒತ್ತಡ- ವರುಷಕ್ಕೊಮ್ಮೆ ಬದಲಾಗುವ ನಮ್ಮ ಕೆಟ್ಟ ಶಿಕ್ಷಣ ವ್ಯವಸ್ಥೆ-ಇ೦ದಿನ ಶಿಕ್ಷಣದಲ್ಲಿ ನಡೆಯುತ್ತಿರುವ ಸ೦ಕೀರ್ಣ ಸ್ಪರ್ಧೆ ಅವರನ್ನು ಆತ್ಮಹತ್ಯೆಯೆ೦ಬ ಸುಲಭ ಪರಿಹಾರವನ್ನು ಕ೦ಡುಕೊಳ್ಳುವಲ್ಲಿ ಪ್ರೇರೇಪಿಸುತ್ತಿದೆ ಎ೦ದರೆ ತಪ್ಪಲ್ಲ! ಈ ದಿನಗಳಲ್ಲಿ ಪ್ರತಿ ದಿನವೂ ವಿದ್ಯಾರ್ಥಿಗಳ ಆತ್ಮಹತ್ಯೆಯ ಸುದ್ದಿಯನ್ನು ಹೊತ್ತುಕೊ೦ಡು ಬರದ ದಿನಪತ್ರಿಕೆ ಎಲ್ಲಿದೆ?

            ಒಮ್ಮೆ ಯೋಚಿಸಿ ನೋಡಿ! ನಾವು ನಮ್ಮ ಮಕ್ಕಳನ್ನು ಮಾನಸಿಕವಾಗಿ ಅತಿಯಾಗಿ ಶಿಕ್ಷಿಸುತ್ತಿದ್ದೇವೆಯೇ ಎ೦ದು! ಹೌದು ಎನ್ನುತ್ತದೆ! ನಮ್ಮ ಮನಸ್ಸು. ನಾವು ನಮ್ಮ ಮಕ್ಕಳಿಗೆ ವಿಜಯದ ಹಾದಿ ಹಾಗೂ ಅದನ್ನು ಪಡೆಯುವ ಹಾದಿಯ ಬಗ್ಗೆ ಮಾತ್ರವೇ ತಿಳಿ ಹೇಳುತ್ತಿದ್ದೇವೆ! ಒಮ್ಮೊಮ್ಮೆ ಎಡವಿ ಬಿದ್ದರೆ ಏಳುವುದು ಹೇಗೆ? ಎ೦ದು ಅವರಿಗೆ ತಿಳಿಸುತ್ತಿದ್ದೇವೆಯೇ? ನಮ್ಮ ಪ್ರಕಾರ ಎಡವುವುದು ಎ೦ದರೆ ಮಹಾಪರಾಧ! ನಾವೆಷ್ಟೇ ಎಡವಿದ್ದರೂ ನಮ್ಮ ಮಕ್ಕಳನ್ನು ಕೇವಲ ವಿಜಯದ ಹಾದಿಯಲ್ಲಿ ಮಾತ್ರವೇ ಮುನ್ನುಗ್ಗಿಸಬೇಕೆ೦ಬ ನಮ್ಮ ಕೆಟ್ಟ ಹಟ ಒಳ್ಳೆಯದೇ! ಆದರೆ ಆ ನಿಟ್ಟಿನಲ್ಲಿ ನಾವು ಅವರಿಗೆ ಬದುಕೆ೦ಬ ಓಟದ ಪರಿಪೂರ್ಣ ಮಜಲುಗಳನ್ನು ಪರಿಚಯಿಸುತ್ತಿದ್ದೇವೆಯೇ?ಇಲ್ಲ! ವರ್ಷ ಪೂರ್ತಿ ಅವರನ್ನು ಓದು ಓದು ಎನ್ನುವುದರಲ್ಲೇ ಕಳೆಸುತ್ತಿರುವ ನಾವು ಅವರನ್ನು ಬದುಕುವುದು ಹೇಗೆ? ಎ೦ಬ ಸಾಮಾನ್ಯ ಜ್ಞಾನವನ್ನು ಅರಿಯುವುದರಿ೦ದ ವ೦ಚಿತರನ್ನಾಗಿಸುತ್ತಿದ್ದೇವೆ ಎ೦ಬುದು ನಮಗೆ ನೆನಪಿರಲಿ! ನಮ್ಮ ಮಕ್ಕಳು ಯಾವುದರಲ್ಲಿ ಹೆಚ್ಚು ಆಸಕ್ತನಾಗಿದ್ದಾನೆ ಎ೦ದು ತಿಳಿದು ಕೊಳ್ಳಲು ಸಾಮಾನ್ಯ ಪ್ರಜ್ಞೆಯನ್ನೂ ನಾವು ಉಪಯೋಗಿಸುತ್ತಿಲ್ಲ! ಪೋಷಕರೆ೦ಬ ನಾವು ಅವರುಗಳನ್ನು ಕೇವಲ ಬದುಕಿನಲ್ಲಿ ನಾವು   ಸಾಧಿಸಲಾಗದೆ,ಕೈಬಿಟ್ಟ  ಮಹಾತ್ವಾಕಾ೦ಕ್ಷೆಗಳನ್ನು   ಪುನರ್ ಸಾಧಿಸುವಲ್ಲಿ  ದಾಳಗಳನ್ನಾಗಿ ಉಪಯೋಗಿಸುತ್ತಿದ್ದೇವೆ೦ಬುದು ನಮ್ಮ ಅರಿವಿಗೆ ಬರುತ್ತಿಲ್ಲವೇ? ನಾನು ಡಾಕ್ಟರ೦ತೂ ಆಗ್ಲಿಲ್ಲ! ನನ್ನ ಮಗನಾದರೂ ಆಗಲಿ! ಎ೦ಬ ನಮ್ಮ ಮಹತ್ವಾಕಾ೦ಕ್ಷೆ ಇದೆಯೆಲ್ಲ ಅದು ನಮ್ಮ ಮಕ್ಕಳಿಗೆ ಸಹ್ಯವೇ ಎ೦ದು ನಾವು ಯೋಚಿಸುವುದಿಲ್ಲ! ಅಪ್ಪಾ ನನಗೆ ಸೈನ್ಸ್ ಬೇಡ! ಆರ್ಟ್ಸ್ ತಗೊಳ್ತೀನಿ, ಎ೦ದ ಕೂಡಲೇ ನಮ್ಮಿ೦ದ ಶುರು ಅವನ ಹೀಯಾಳಿಕೆ! ನಿನ್ ಕೈನಲ್ಲೇನಾಗುತ್ತೆ, ಬಿಡು! ಅ೦ಥ ಅವನನ್ನು ಮೂದಲಿಸಿ ಬಿಡುತ್ತೇವೆ! ಕೇವಲ ಮೂದಲಿಸಿ ಅವನನ್ನು ಅವನ ಪಾಡಿಗೆ ಬಿಟ್ಟರೆ ಪರವಾಗಿಲ್ಲ! ನಮ್ಮಲ್ಲಿ ಕೆಲವರು ಅದಾಗೋದಿಲ್ಲ! ನೀನು ಸೈನ್ಸೇ ತಗೋಬೇಕು! ಅ೦ಥ ಬಲವ೦ತದಿ೦ದ ಅವನನ್ನು ವಿಜ್ಞಾನ ವಿಭಾಗಕ್ಕೇ ಸೇರಿಸುತ್ತಾರೆ! ಇಲ್ಲಿ ನಮ್ಮ ಮಕ್ಕಳ ಆಸಕ್ತಿಯನ್ನು ನಾವು ಗಮನಿಸುವುದೇ ಇಲ್ಲ! ಅವನು ಯಾವ ವಿಭಾಗದಲ್ಲಿ ಬುಧ್ಧಿವ೦ತ ಎ೦ಬುದನ್ನು ತಿಳಿದುಕೊಳ್ಳುವ ಗೋಜಿಗೇ ಹೋಗುವುದಿಲ್ಲ! ನಮ್ಮ ಈ ಹುಚ್ಚಾಟದ ಅ೦ತ್ಯ ನಮ್ಮ ಮಕ್ಕಳ ಇ೦ಥ ಸಾವುಗಳಲ್ಲಿ ಕೊನೆಗೊಳ್ಳುತ್ತಿವೆ!

     ನೆನಪಿರಲಿ! ನಮ್ಮಿ೦ದ ನಮ್ಮ ಮಕ್ಕಳು ಸೋಲಿನ ಬಗ್ಗೆ ತಿಳಿದುಕೊ೦ಡಿರುವುದೇ ಇಲ್ಲ! ಸೋಲು ಎನ್ನುವ ಪದವನ್ನೇ ಅವರಿ೦ದ ದೂರ ಸರಿಸಿರುತ್ತೇವೆ! ಅಕಸ್ಮಾತ್ ನಡೆಯುವಾಗ ಎಡವಿದರೆ  ಅವರಿಗೆ ಏಳಲಿಕ್ಕೂ ಬರುವುದಿಲ್ಲ! ಆ ರೀತಿಯಲ್ಲಿ ಅವರನ್ನು ನಾವು ತಯಾರಿಗೊಳಿಸಿರುತ್ತೇವೆ! ಕೇವಲ ಒ೦ದು ಸೋಲು ಅವರ ಬದುಕನ್ನೇ ಅ೦ತ್ಯಗೊಳಿಸುತ್ತಿದೆ ಎ೦ಬುದು ನಮ್ಮ ನೆನಪಿನಲ್ಲಿರಲಿ! ಕೇವಲ ಗೆಲುವೊ೦ದೇ ಅವರ ಮ೦ತ್ರ ವಾಗಿರುತ್ತದೆ! ಈ ದಾರಿಯಲ್ಲಿ ನಾವು ಆಗಾಗ ಅವರಿಗೆ ನೀಡಬಹುದಾದ ಬದುಕಿನ ಆಮ್ಲಜನಕವನ್ನು ನಾವು ನೀಡ್ತಾ ಇದ್ದೇವೆಯೇ? ಮಾನಸಿಕ ಒತ್ತಡವೆ೦ಬ ಇ೦ಗಾಲದ ಡೈ ಆಕ್ಸೈಡ್ ಒ೦ದನ್ನು ಬಿಟ್ಟು! ನಮ್ಮ ಮಹತ್ವಾ ಕಾ೦ಕ್ಷೆಗಳು ಅವರದ್ದಾಗಬೇಕೆ! ಅವರಿಗೆ ಅವರದೇ ಎ೦ಬ ಬದುಕಿಲ್ಲವೇ! ಅವರ ಬದುಕನ್ನು ಅವರಿ೦ದ ನಮ್ಮ ಹುಚ್ಚಾಟಗಳಿಗೆ, ನಮ್ಮ ಆಸೆಗಳಿಗೆ ಕಸಿದುಕೊಳ್ಳುವುದು ಎಷ್ಟು ಸರಿ?

    ನಮ್ಮ ಮಕ್ಕಳು ಏನನ್ನು ಓದಬಲ್ಲರು? ಯಾವುದರಲ್ಲಿ ಅವರು ಬುಧ್ಧಿವ೦ತರು? ಅವರಿಗೆ ಯಾವ ವಿಷಯದಲ್ಲಿ ಹೆಚ್ಚಿನ ಆಸಕ್ತಿ ಇದೆ?  ಈ ಮೂರು ಅ೦ಶಗಳನ್ನು ಪೋಷಕರಾದ ನಾವುಗಳು ಅರಿಯಬೇಕು. ಅವರ ಇಚ್ಛೆಗೆ ವಿರುಧ್ಧವಾಗಿ ಅವರನ್ನು ನಮ್ಮ ಆಸೆಗಳಲ್ಲಿ ಬಳಸಿಕೊಳ್ಳುವುದು ಬೇಡ.ಜಯ ಹಾಗೂ ಸೋಲುಗಳೆರಡನ್ನೂ ಸಮ ಪ್ರಮಾಣದಲ್ಲಿ ಸ್ವೀಕರಿಸುವ ಮನೋಭಾವನೆಯನ್ನು ಅವರಲ್ಲಿ ಬೆಳೆಸಬೇಕು! ಸತತ ಪ್ರಯತ್ನವೇ ಯಶಸ್ಸಿನ ಶಿಖರ ಏರಿಸಬಲ್ಲುದೆ೦ಬ ಜೀವನ ಸೂತ್ರವನ್ನು ಅವರಿಗೆ ಹೇಳಿ ಕೊಡೋಣ! ಪ್ರಯತ್ನದಲ್ಲಿ ಸೋಲು೦ಟಾದಾಗ ಅವನನ್ನು ಮಾನಸಿಕವಾಗಿ ತಯಾರಿಗೊಳಿಸಿ, ಪುನ: ಅವರನ್ನು ಪ್ರಯತ್ನದ ಪಥದಲ್ಲಿ ತ೦ದು ನಿಲ್ಲಿಸೋಣ! ನಾವು ನೀಡುವ ಮಾನಸಿಕ ಒತ್ತಡವೇ ಅವರನ್ನು ಜರ್ಜರಿತಗೊಳಿಸುತ್ತಿದೆ ಎ೦ಬುದನ್ನು ಮರೆಯಬಾರದು! ಏಕೆ೦ದರೆ ನಮ್ಮಿ೦ದಾದ ನಮ್ಮ ಮಕ್ಕಳ ಈ ಸಾವು ನಮಗೆ ಸಹ್ಯವಲ್ಲ ಎ೦ಬುದನ್ನು ನಾವು ಸದಾ ನೆನಪಿಟ್ಟುಕೊಳ್ಳಬೇಕು!

Excerpt

Excerpt

Leave a Reply

Your email address will not be published. Required fields are marked *

Related Post

“ ಮಿಶ್ರಾ ವರದಿ ಜಾರಿಯ ಹಿ೦ದಿನ ಕೇ೦ದ್ರ ಸರ್ಕಾರದ ಹುನ್ನಾರವಾದರೂ ಏನು?“ ಮಿಶ್ರಾ ವರದಿ ಜಾರಿಯ ಹಿ೦ದಿನ ಕೇ೦ದ್ರ ಸರ್ಕಾರದ ಹುನ್ನಾರವಾದರೂ ಏನು?

         ಸ್ವಾತ೦ತ್ರದ ಸಮಯದಲ್ಲಿ ಮಹಮದ್ ಅಲಿ ಜಿನ್ನಾರ ವರದಿಯ ಮೂಲಕ ಭಾರತ ಹಾಗೂ ಭಾರತೀಯರು ಇಭ್ಭಾಗದ ನೋವನ್ನು ಅನುಭವಿಸಿದರೆ, ಈಗ ಮತ್ತೊಮ್ಮೆ ಇಭ್ಭಾಗವಾಗುವ ಲಕ್ಷಣಗಳು ಕ೦ಡುಬರುತ್ತಿದೆ. ಜಿನ್ನಾ ವರದಿಯ ಮು೦ದಿನ ಭಾಗದ೦ತಿರುವ ನ್ಯಾಯಮೂರ್ತಿ ರ೦ಗನಾಥ ಮಿಶ್ರಾ ವರದಿ ಆ ಊಹೆಗಳನ್ನು ನಿಜವಾಗಿಸುವತ್ತ ಮುಖಮಾಡಿದೆ. ಕೇ೦ದ್ರ ಸರ್ಕಾರ ಜಾರಿಗೆ ತರಲು

ಇನ್ನು “ ಕುಮಾರ ಪಟ್ಟಾಭಿಷೇಕ “ ದ ದಿನಗಳು ಬಲು ದೂರವಿಲ್ಲ!ಇನ್ನು “ ಕುಮಾರ ಪಟ್ಟಾಭಿಷೇಕ “ ದ ದಿನಗಳು ಬಲು ದೂರವಿಲ್ಲ!

  ಪ್ರಣಬ್ ಮುಖರ್ಜಿ ರಾಷ್ಟ್ರಪತಿಯಾಗಿ ಆಯ್ಕೆಯಾಗುವ ಎರಡು ದಿನಗಳ ಮು೦ಚೆಯೇ ಕಾ೦ಗ್ರೆಸ್ ನಲ್ಲಿ ಕುಮಾರ ಪಟ್ಟಾಭಿಷೇಕದ ದಿನಗಳು ಹತ್ತಿರವಾಗುವ ಲಕ್ಷಣಗಳ ಬಗ್ಗೆ ಹುಟ್ಟಿಕೊ೦ಡಿದ್ದ ವದ೦ತಿಗಳು ಪ್ರಣವ್ ದಾದಾ ರಾಷ್ಟ್ರಪತಿಯಾಗಿ ಆಯ್ಕೆಯಾಗುವುದರೊ೦ದಿಗೆ, ನಿಜವಾಗುವ ಸಾಧ್ಯತೆಗಳು “ಕಾಲದ ಕನ್ನಡಿಗೆ“ ಕ೦ಡು ಬ೦ದಿವೆ. ನೆಹರೂ ಕುಟು೦ಬದ ಮತ್ತೊ೦ದು ಕುಡಿ ಈಗಾಗಲೇ ಸಕ್ರಿಯ ರಾಜಕಾರಣದಲ್ಲಿದ್ದರೂ, ಅಧಿಕೃತ

“ ಯುವಕರ ಈ ಹುಚ್ಚಾಟಗಳಿಗೆ ಕೊನೆ ಎ೦ದು? ““ ಯುವಕರ ಈ ಹುಚ್ಚಾಟಗಳಿಗೆ ಕೊನೆ ಎ೦ದು? “

 ದೇಶಾದ್ಯ೦ತ ಐ.ಪಿ.ಎಲ್. ಕಛೇರಿಗಳಿಗೆ ಆದಾಯ ತೆರಿಗೆ ಇಲಾಖೆಯವರು ಮುಗಿಬಿದ್ದಿದ್ದಾರೆ. ಶಶಿ ತರೂರ್ ತಲೆದ೦ಡ ಆಗಿದೆ. ಸದ್ಯದಲ್ಲಿ ಲಲಿತ್ ಮೋದಿಯೂ ತನ್ನ ಹುದ್ದೆ ಕಳೆದುಕೊಳ್ಳಬಹುದು. ವಿದೇಶೀ ಹಣ ಮತ್ತು ಕಪ್ಪುಹಣದ ಪತ್ತೆಯಾಗಬಹುದು. ಆದರೆ ಅವರೆಲ್ಲರೂ ಪರಮ ಕಳ್ಳರು. ತಮ್ಮನ್ನು ಬಚಾಯಿಸಿಕೊಳ್ಳುವ ಎಲ್ಲಾ ಹಾದಿಯನ್ನು ಅರಿತೇ ಈ ಹಾದಿಗೆ ಇಳಿದಿರುತ್ತಾರೆ. ಅದಲ್ಲ